Orðin sem við skiljum ekki
Útvarpsþættir, Rás 1, 2021
Í bókinni Um tímann og vatnið fjallar Andri Snær Magnason um þær grundvallarbreytingar sem munu verða á mannlífi og jarðlífi á næstu hundrað árum sökum hnattrænnar hlýnunar. Þessar breytingar eru „flóknari en flest það sem hugurinn er vanur að fást við, stærri en öll fyrri reynsla okkar, stærri en tungumálið.“ Orðin sem við skiljum ekki er útvarpssþáttaröð í sex hlutum þar sem blaðamaðurinn og rithöfundurinn Þorvaldur S. Helgason fjallar um tímann og vatnið, kafar dýpra í helstu umfjöllunarefni bókarinnar og ræðir við vísindamennina, heimspekingana og aðgerðasinnana sem hafa helgað líf sitt því að rannsaka málefni sem eru stærri og flóknari en orð fá lýst.
​
Hlustið á þættina í heild sinni hér að neðan.
Listin að brenna bækur
Útvarpsþættir, Rás 1, 2019
Listin að brenna bækur er útvarpsþáttaröð í sex hlutum sem kannar heillandi og dularfulla sögu týndra og glataðra bóka. Farið verður með hlustendur í ferðalag um bókmenntaheiminn allt frá 4. öld fyrir Krist til dagsins í dag og rakin verður saga sex atburða sem urðu til þess að þekkt verk glötuðust úr bókmenntasögunni fyrir fullt og allt.
Hlustið á þættina í heild sinni hér að neðan.
Hve glötuð er vor æska?
Hlaðvarpsþættir, RÚV Núll, 2018
Hve glötuð er vor æska? er tólf þátta sería þar sem Þorvaldur Sigurbjörn Helgason skoðar bókmenntaheiminn á Íslandi með sérstaka áherslu á unga höfunda og lesendur. Eiga bókmenntir ennþá erindi við ungt fólk? Hvort var Jónas Hallgrímsson spíttskáld eða strætóskáld? Leynist kannski næsta þjóðskáldið á Twitter? Í hverjum þætti verður eitt bókmenntaform tekið fyrir og rætt við rithöfunda og sérfræðinga á því sviði; upprennandi ungskáld jafnt sem lifaða lærimeistara.
​
Hlustið á fyrstu sex þættina hér að neðan og seríuna í heild sinni hér:
​